ملخص وتحليل مباراة ساجرادا والزمالك 0-0 الابيض يضمن التأهل || 20 ديسمبر 2023
ضمن #الزمالك تأهله لدور الثمانية من كاس #الكونفدرالية بعد تعادله السلبي خارج ملعبه امام #ساجرادا الانجولي في اطار مباريات الجولة الرابعة من دور المجموعات
ورفع الزمالك رصيده الى 10 نقاط في صدارة المجموعة وضمن التأهل رسميا الى دور الثمانية سواء كأول المجموعة او ثاني المجموعة
الزمالك مع معتمد جمال دخل المباراة بفكرة واحدة طبقها على مدار الشوطين، وهي محاولة خطف هدف مبكر اول ربع او تلت ساعة وفعلا الزمالك نجح في خلق العديد من الفرص في الفترة لكن للأسف الرعونة وغياب التركيز وضعف الكواليتي الواضح كان سبب في عدم التسجيل
الفرصة الاولى كانت للجزيري بعد بينية جميلة من عمرو السيسي انفراد الجزيري لكنه تباطأ لغاية ما المدافع تدخل ومنع هدف اكيد
في الدقيقة 14 شبه انفراد لزيزو من ناحية الشمال لكنه حط الكورة سهلة في ايد حارس ساجرادا رغم ان المرمى كان مفتوح تماما يحطها في اي زاوية لكنه حطها سهلة في نص الجون
بعدها فرصتين خطيرتين للزمالك من تسديدات من خارج المنطقة، الاولى لروقا وتصدى ليها الحارس ببراعة، والكورة التانية بنفس الطريقة لعمر جابر اللي سدد لكن الحارس واصل التألق وخرجها ركنية
بعد اول تلت ساعة رجع الزمالك لمناطقه الدفاعية وبدأ يعتمد على المرتدات ومسك ساجرادا الملعب وضيع فرصة خطيرة جدا بعد انفراد كامل لكن دونجا شال الكورة من قدام المهاجم في اخر لحظة
اعتمد ساجرادا في هجومه على الناحية اليمين اللي هي الشمال للزمالك عند عبد الشافي وعملوا كذا عرضية لكن الدفاع تعامل معاها بثبات
يمكن الزمالك حاول يقسم كل شوط على مرحلتين، اول تلت ساعة زي ما قلنا هجوم ضاري لمحاولة خطف هدف، والجزء التاني من الشوط عودة للخلف ومحاولة الحفاظ على التعادل
الاسلوب ده ممكن يكون نجح النهاردة لكنه في الاختبارات الاصعب احتمالات فشله هتكون كبيرة جدا، خصوصا ان الزمالك النهاردة كان محظوظ انه بيلعب في ملعب خالي تقريبا من الجماهير، عكس لما هيلعب في الادوار الاقصائية هيكون فيه عشرات الالاف من جماهير الفرق المنافسة، اذا كنت مقرر انك هتهاجم اول تلت ساعة يبقى لازم تركيز شديد انك تسجل، مينفعش انك ترجع للدفاع من غير ما تكون متقدم في النتيجة، لإنك ممكن تهاجم اول تلت ساعة وتفشل في التسجيل وبعد كده ترجع الدفاع وتستقبل جول وتفضل تطارد النتيجة طول الماتش وده هيبقى خطر جدا في الادوار الاقصائية
الشوط التاني نفس وتيرة وتكتيك الشوط الاول تماما، الزمالك اول تلت ساعة مصمم على تسجيل هدف لكنه للأسف بيضيع كل الفرص
الفرصة الاولى في الشوط التاني كانت من ركنية وصلت الكورة لناصر منسي لوحده جوه ال 6 ياردات بيسدد في جسم الحارس بغرابة عشان يضيع هدف ميضيعش من الزمالك
بعدها ركنية جديدة وعرضية مميزة تانية من زيزو الحارس بيفشل انه يمسك الكورة بتوصل للمثلوثي والمرمى فاضي تماما بيلعبها ضعيفة بيطلعها الدفاع من على خط المرمى عشان يضيع هدف اكيد مرة تانية
بعدها فرصة كبيرة مرة تالتة للزمالك بعد ما قطع شيكا البديل الكورة في مكان ممتاز ومرر للجزيري اللي سدد على طول فوق العارضة بأقل من ياردة رغم انه كان طالعله عمر جابر انفراد على اليمين وزيزو انفراد على الشمال لكنه كان اناني وفضل التسديدة مباشرة
بعدها فرصة رابعة للزمالك بعد تسديدة ممتازة بالقدم اليسرى من ناصر منسي لكن الكورة بتعدي جنب القايم بسنتيمترات عشان يضيع هدف مؤكد جديد
بعدها وكعادة الشوط الاول بيرجع الزمالك للدفاع تماما اخر تلت ساعة بتغييرات واضحة من معتمد جمال باللعب بخمس مدافعين بدل اربعة، بينزل عبدالله جمعة باك شمال وبيدخل عبد الشافي كمدافع تالت مع المثلوثي وعبد الغني، وبيسيب معتمد جمال زيزو وشيكا اتنين مهاجمين، مع ان كان المفروض انه سامسون ينزل مكان زيزو كمحطة هجومية عشان تقدر تعمل هجمات مرتدة ممكن تخلص بيها الماتش، لكن معتمد جمال من الدقيقة 70 مكانش بيدوّر غير على النقطة وبس
ساعده على نجاح خطته المردود المتواضع جدا اللي قدمه ساجرادا في المباراة، فريق معندوش اي حاجة تخوف ولاعيبة اغلبها بيلعب لنفسه وعندهم انانية مفرطة في التلت الاخير من الملعب وده اللي خلى ساجرادا مش قادر انه يخلق فرص كتير رغم تراجع الزمالك الكبير في اخر تلت ساعة
انتهت المباراة بالتعادل السلبي واوضحت المباراة ان الزمالك لو عايز يكسب الكونفدرالية لازم صفقات من العيار التقيل على الاقل 3 صفقات في الوسط والهجوم، لاعيبة من عينة اشرف بن شرقي والياس الجلاصي ومهاجم اجنبي محترم
معتمد جمال كمدرب مصري من وجهة نظري انه ماشي كويس خصوصا مع ضعف الكواليتي المرعب في الفريق، المشكلة الاكبر في قايمة اللاعيبة اللي عند الزمالك مش المدرب، خصوصا ان الزمالك صعب جدا يدفع كل غرامات فيفا ويجيب صفقات ويجيب مدرب اجنبي، اعتقد الاولوية اولا لفك القيد ودفع كل الغرامات، وبعدين نجيب صفقتين تلاتة تقال وبلاش شغل الشروة واللاعيبة متوسطة الامكانيات، الزمالك عايز لاعيبة تقيلة تشيل الفريق والفريق يعتمد عليها وانهم يشكلوا نسبة 80% على الاقل من قوة الفريق بعد يناير
لتحميل ملخص المباراة اضغط هنا
