تحليل ما بعد مباراة الزمالك والمصري واسباب الخسارة وماذا يحتاج الفريق 14 ديسمبر 2023

 اهلا بيكم ومقال جديد على مدونتكم ملتقى جماهير الزمالك

للأسف خسر #الزمالك من #المصري 1-0 في الدوري عشان يبتعد اكلينيكيا عن صراع الصدارة واستعادة اللقب المحلي، خصوصا ان الفريق وقت اوسوريو فرط في عدد كبير من النقط صعبت المهمة على المدرب المؤقت معتمد جمال في انه يحافظ على الانتصارات لفترة طويلة.

تراجع الزمالك بدأ من مباراة ساجرادا في الكونفدرالية مش ماتش النهاردة، وتحديدا بعد ما وقع معتمد جمال عقد رسمي لتدريب الفريق واعتقد ان ده خطأ كبير من الادارة،  لإن المدرب المصري عموما مش بيتحمل الضغوط بتاعت الفرق اللي بتلعب على بطولات، معتمد جمال كان ماشي كويس طول ما هو بيتقال عليه مدرب مؤقت وشغال بدون عقد، اول ما مضى العقد وبقى هو المسئول عن كل حاجة بدأت المشاكل تظهر في الاداء، 

الزمالك ماتش ساجرادا كسب رغم ان الاداء كان سيء جدا وقلنا مش مشكلة المهم اننا كسبنا، النهاردة قدام المصري الاداء كان اكثر سوءًا وللأسف خسر الفريق للمرة الاولى مع #معتمد_جمال.

لو جينا للماتش نفسه هنلاقي ان معتمد جمال مبدأش بشيكابالا من البداية ودي حاجة غريبة جدا، اللي انا فاهمه ان المدرب بيريح شيكابالا لماتش ساجرادا بره الارض يوم الاربعاء الجاي، طيب سؤال بالمنطق ايهما اهم ماتش المصري ولا ساجرادا، الاكيد ان ماتش المصري هو الاهم لإنك متأخر في النقط ومحتاج انك تنزل كل ماتش بالقوة الضاربة بتاعتك عشان تكسب وتضغط باقي المنافسين، عكس ماتش ساجرادا الاقل اهمية خصوصا انك فزت بأول 9 نقط في المجموعة وكل اللي محتاجه للتأهل هو نقطة واحدة بس، كان لازم شيكا يبدأ النهاردة ونحاول نخلص المباراة وبعدين في الشوط التاني نأمن الملعب.

المشكلة التانية ان اللي بدأ هو سيد نيمار مش ابراهيما نداي اللي متعود يبدأ اساسي حتى لو مستواه مش عاجب البعض لكنه فعال اكتر من نيمار وكان لازم هو اللي يبدأ، كمان وجود الجزيري كمهاجم وهو لاعيب مستواه متذبذب بقاله اكتر من سنة وواضح انه مش هيقدم للفريق اكتر من اللي قدمه في اول سنة ونص ليه مع الفريق، كمان اوباما النهاردة احنا مش عارفين هل هو لاعيب رقم 10 ولا مهاجم تاني مع الجزيري، معتمد جمال فكّر كتير عشان كده غِلِط وبالتالي خسر المباراة.

رغم كده بداية الزمالك في الماتش كانت جيدة وكان يقدر اول تلت ساعة بالذات انه يسجل هدف على الاقل وياخد المبادرة، بعد اول تلت ساعة بدأ المصري يدخل في جو الماتش بفضل الثنائي الاجنبي (الاجانب بجد) الياس الجلاصي وجيلاس قناوي اللي حرفيا مسحوا نص ملعب الزمالك تماما، للأسف الزمالك بعد رحيل طارق وساسي بقى اي فريق في الدوري عنده لاعيبة كويسة في نص الملعب يقدر يكسبه بسهولة، واعتقد ان دي اول مشكلة لازم يشتغل عليها مجلس الادارة بعد فك القيد، لازم لعيب 6 سوبر ولاعيب 8 او 10 سوبر، لو عرفنا نجيب الصفقتين دول هيبقى لينا حظ في الفوز ببطولة مهمة السنة دي بالذات الكونفدرالية اللي انا شايفها انها مش صعبة لو قدرنا كمان نجيب مدرب اجنبي في يناير.

نقطة التحول الكبيرة في الماتش كانت اصابة عمر جابر ونزول محمد طارق، اصابة عمر مش هي الكارثة، لكن الكارثة كانت في محمد طارق اللي ارتكب كل المبيقات الممكنة في كرة القدم اللي تكره جمهور الزمالك كله في الكورة، كم رهيب من الكور المقطوعة في اماكن صعبة، فضلا عن فشله في تسجيل هدف سهل جدا في نهاية الشوط الاول، واكتملت الجريمة بإشتراكه في هدف المصري بعد ما ساب الجناح اللي هو اصلا مكلف برقابته جيلاس قناوي اللي استغل خطأ اضافي من المثلوثي وانفرد بعواد وسجل هدف المصري

احنا مش كل ما هيحصل خطأ هنقول ان عواد هينقذنا، الراجل ميقدرش يعمل حاجة اكتر من اللي هو بيعملها، كفاية انه تصدى لضربة جزاء من الياس الجلاصي، اللي لو كانت دخلت كان ممكن شكل النتيجة يبقى اسوأ كمان، وكويس ان الجلاصي هو اللي شاطها مش باهر المحمدي اللي متخصص في ضربات الجزاء وسجل منها قدام الزمالك قبل كده.

الشوط التاني وبدل ما ينزل شيكا من بدايته فِضِل معتمد جمال سايبه على الخط لغاية اخر ربع ساعة وده خلى المصري يستمر على سيطرته على نص الملعب في جزء كبير من الشوط التاني لغاية ما جت التغييرات، خصوصا نزول السيسي اللي عمل نقله في مسألة قطع الكورة لكني كنت بفضّل انه روقا هو اللي يطلع مش دونجا، صحيح ان دونجا عاد للأداء السيء اللي كان ايام اوسوريو لكنه برده مكانش يطلع، نزول ابراهيما نداي مكان نيمار في الشمال نشّط الجبهة دي شوية لكن للأسف لإن محمد الشافي ميقدرش يلعب 90 دقيقة مقدرش الزمالك يستفيد من وجود نداي لإن تقدم عبد الشافي مكانش كبير

واصل معتمد جمال تغييراته بنزول ناصر منسي مكان الجزيري، مش عارف ليه مقررناش نلعب ب 2 مهاجمين ونشيل اوباما من الملعب، كده كده اوباما مش بيرجع مع نص الملعب عشان يواجه الزيادة العددية بتاعت نص ملعب المصري ووجوده كمهاجم تاني شبه معدوم، رأيي كان ينزل سامسون وناصر منسي 2 مهاجمين ويخرج الجزيري واوباما، وجربنا في ماتش بيراميدز في الكاس ونفعت والله والاتنين سجلوا كمان.

اخيرا في الدقيقة 77 افتكر معتمد جمال انه عنده لاعيب مهم اسمه شيكابالا لازم ينزل، هو كان مستني ايه مثلا عشان ينزله، والمفروض انه يعمل ايه في ربع ساعة والماتش بقى متكهرب زيادة والمصري بيلعب بقوة لتأمين المكسب، لو كان نزل مع بداية الشوط التاني كان هيبقى عنده مساحة اكبر بكتير انه يصنع الفارق، للأسف اللي حذرت منه قبل الماتش حصل بالحرف وهو التأليف والتفكير الكتير من المدرب.

خسارة الزمالك بالتأكيد كانت مستحقة وكشفت كل المشاكل قصاد الادارة بكل وضوح، المطلوب دلوقتي التفكير في مدرب اجنبي في يناير يمسك الفريق في الشهر التوقف بتاع كاس الامم، والادارة اتفقت على معسكر في الامارات هيتلعب فيها دورتين بمشاركة الزمالك على الاقل هتلعب 4 ماتشات مع فرق كبيرة في السعودية والامارات وقطر، هيكون احتكاك كويس جدا وفرصة للمدرب انه يشوف الفرقة على الطبيعة ونحدد المشاكل والمراكز اللي ناقصة الفريق.

لازم من دلوقتي يبقى التفكير كله في حل ازمة القيد قبل ما يناير يبدأ عشان لما ندخل مفاوضات مع اي لاعب يبقى عندنا اولوية في التعاقد معاه، كفاية اننا ضيعنا بنسبة 99% فرصة التعاقد مع عمر كمال عبد الواحد بسبب ان اللاعب رافض التوقيع لإن الزمالك مش عارف يفك القيد.

لازم يبقى فيه اتجاه لبيع كل الاجانب بإستثناء المثلوثي، لو عرضنا الجزيري ونداي وسامسون، التلاتة ممكن يجيبوا للزمالك على الاقل 2.5 مليون دولار بالذات الجزيري هيجيله عروض كويسة، التلاتة كده كده تأثيرهم مش كبير ويمكن الاستغناء عنه، بدل ما تفكر في بيع زيزو وتاخد فلوسه بس متقدرش تعوض القيمة الفنية بتاعته وتكتشف ان الفرقة فضيت اكتر ما هي فاضية اساسًا.

بالنسبة لزيزو لو انت ناوي تبيع اللاعب لازم تكون مجهز لاعب تقيل مكانه وانا بقترح هنا بالاسم بن شرقي انه يرجع تاني، بن شرقي فاضله 6 شهور مع الريان القطري وممكن يبقى عندهم قابلية انهم يبيعوه، ممكن تدفعلهم مثلا مليون دولار مقابل ال 6 شهور الباقية واللاعب لو هياخد 2 مليون دولار سنويا يبقى تمام، طبعا ده مش هيحصل غير لو بعت زيزو بمبلغ لا يقل عن 8 مليون دولار، على ال 2.5 مليون دولار بتوع الجزيري وسامسون ونداي اللي اتكلمت عليهم فوق يبقى 10.5 مليون دولار، تقدر تحل بيهم معظم المشاكل المالية اللي عندك، متمشيش زيزو وتجيب المجهول، هات لاعيب انت تعرفه وتألق عندك ومش هياخد وقت في التأقلم على الاجواء.

بس الاهم من ده هو التعاقد مع لاعيب رقم 6 تقيل وياريت يكون اجنبي، ولاعيب رقم 10 زي الياس الجلاصي مثلا وانا بقوله بالاسم لإنه تقريبا اللاعب الوحيد اللي بره الاهلي وبيراميدز اللي يليق انه يجي الزمالك.

نتمنى تدارك الهزيمة في المباراة الجاية مع ساجرادا والعودة بنقطة التعادل على الاقل عشان نحسم مسألة التأهل ونبعد عن اي سيناريوهات قذرة، قبل ماتشنا الاخير قبل التوقف واللي هيكون قصاد سيراميكا اللي للأسف هيكون اصعب من المصري لإنه فريق مميز ولعب ماتشات كبيرة السنة دي ومعاهم مدرب كبير ايمن الرمادي.

في النهاية بقول هاردلك لكل جمهور الزمالك وان شاء الله عندنا امل كبير ان الدنيا تتحسن مع بداية يناير ان شاء الله.