تحليل ما قبل مباراة الزمالك والمصري الخميس 14 ديسمبر 2023
دي اول مقالة ليا على موقع بلوجر، وهتكون المدونة دي مخصصة لكل حاجة عن #الزمالك من تحليل مباريات لمناقشة اخبار الفريق كل يوم والتعليق عليها.
النهاردة هنتكلم عن ماتش مهم جدا للزمالك في الدوري قصاد #المصري، طبعا الماتش هيكون في برج العرب الساعة 7 مساء.
الزمالك طبعا موقفه سيء في الدوري السنة دي من البداية بسبب النقط الكتير السهلة اللي ضيعها علينا اوسوريو قبل رحيله غير المأسوف عليه، دلوقتي معتمد جمال بيحاول انه يلم نقط في الماتشات اللي قبل توقف كاس الامم، على امل ان الاهلي يتعثر تاني، زي ما حصل في اخر ماتشين ضد الجونة وسموحة.
الزمالك حاليا عنده 11 نقطة وفارق بينه وبين بيراميدز 5 نقط والفريقين لعبوا 7 ماتشات، وبفارق 3 نقط بس عن الاهلي اللي لسه عنده ماتش متأجل.
ماتش النهاردة هيشهد اول وجود للونش بعد غياب طويل جدا تقريبا 7 شهور بسبب الصليبي، معرفش بقى هل معتمد جمال هيجازف بيه ولا ممكن ينزله في اخر ربع ساعة مثلا لو الزمالك متقدم وعايز يحافظ على النتيجة، المشكلة ان كل التقارير كانت بتتكلم ان الونش مش هيلعب إلا بعد كاس الامم، كون إنه ينضم دلوقتي ويصمم انه يشارك ده موضوع يخوّف لإن ممكن يكون اللاعب مكتملش شفاءه ويلعب شوية ويتصاب تاني، وده نفس اللي حصل المرة اللي فاتت، لما قرر برده انه يستعجل في العودة عشان يلحق يلعب ماتشات افريقيا تحديدا ماتش شباب بلوزداد هناك في الجزائر اللي كان ماتش حاسم في التأهل واللي للأسف خسرناه، بعدها بأقل من شهرين تقريبا اتصاب الونش في ماتش الاسماعيلي في نص مايو اللي فات، ربنا يستر والمرة دي يكون اللاعب خف تماما من الاصابة بتاعته عشان العملية مش ناقصة
طبعا لسه الثلاثي المتمرد فتوح وصبحي والزناري مش بينضموا للقايمة وده طبعا قرار صح جدا والمفروض انهم مينضموش للقايمة غير لما يجددوا عقودهم، واحنا جربنا السنة اللي فاتت لما جمدنا سيف جعفر ويوسف اسامة نبيه شهرين بس راحوا لبيراميدز مصدّيين ومبيلعبوش كتير خصوصا سيف تقريبا مبيلعبش خالص، لازم الزمالك يمشي على نفس الطريقة ولو اللاعيبة فعلا حست بالغلط اللي هما عملوه فالموضوع بسيط "يجددوا والموضوع يخلص في ساعتها"
ميزة #معتمد_جمال الاساسية هي شبه ميزة كارتيرون شوية اللي هو ثبات التشكيل وعدم التأليف والميل للتأمين الدفاعي واللعب على المرتدات، في حالة الزمالك الحالية ده انسب شكل نلعب بيه لغاية ما يبقى عندنا لاعيبة عليها القيمة، لكن اللاعيبة الحالية اغلبها متوسط ومش هينفع يلعبوا ماتشات مفتوحة زي ما كان اوسوريو بيعمل، مدربين زي فيريرا وجروس وكارتيرون نجحوا مع الزمالك بالطريفة دي رغم انه كان الجيل وقتها مختلف تماما، فما بالك بالجيل الحالي اللي بالتأكيد اقل بكتير.
الميزة التكتيكية اللي اضافها معتمد جمال للزمالك في الماتشات اللي لعبها بعد التوقف الاخير واللي كانت سبب في الصلابة الدفاعية وعدم استقبال الفريق لأي اهداف، هي انه بيثبت ال 4 مدافعين اللي ورا وبتكون المهاجم الهجومية بتاعتهم ضعيفة جدا، عشان يضمن ان الفريق لما يتعمل عليه مرتدات يبقى فيه عدد لاعيبة كفاية في الدفاع يقدروا يتعاملوا مع الموقف، عكس لو انت بتلعب جيم هجومي وجت عليك مرتدات ولاعيبتك بطيئة بتبقى شوارع في الدفاع زي ما كنا بنشوف ايام اوسوريو
اتمنى انه معتمد جمال لغاية التوقف الجاي ميعملش اي مفاجآت في التشكيل او طريقة اللعب خصوصا ان الماتشات الجاية صعبة اساسا ومش لازم نزوّد صعوبتها علينا اكتر، محتاجين جدا الفوز على المصري وسيراميكا عشان نفضل نطارد حلم استعادة الدوري، كمان ماتشنا اللي باقي مع ساجرادا هناك في انجولا محتاجين التعادل اقل حاجة عشان نتجنب السيناريوهات القذرة اللي للأسف مبتحصلش غير مع الزمالك.
ان شاء الله بعد الماتش هعمل مقالة تانية نحلل فيها اللي حصل في الماتش وان شاء الله نكون فايزين بال 3 نقط.
